महेन्द्र रायमझी -

नारायणगढ छिटै पुगेर भेटघाट गर्ने भनेर काठमाण्डौंको ओछ्यानमा अर्लाम लगाएको त्यो घण्टीले उठाउनै सकेन । त्यसैको फलस्वरुप हुनुपर्छ, बाटोमा गाडी हिंडेको हो कि, ट्रयाक्टर नागढुङगाको उकालो काटेपछि सुरु भयो शिवारात्रीको रौनक । त्यसो त पशुपतिनाथमा बाबाजीले दश रुपैयाँ स्टिकमा बेचेको गाँजा तानेर धाक गर्ने पनि शिवरात्रीको अर्को दिन प्रशस्तै भेटिन्छन् सडकमा ।

कुरा गाँजा खान किशोरहरुले जम्मा गरेको पैसाको हो । बुटवल आइपुग्न त्यस्तै सात घण्टा लाग्ने गाडी बुटवल आइपुग्दा नवौं घण्टामा लुखुर लुखुर गर्दै थियो । त्यसो त गाडीलाई निकै भार पर्ने हो कि भन्नेजस्ता मोटाई भएका यात्रु थिए, भैरहवाका, साह्रै रमाइला । तिनकै कारणले पो गाडी ढिला आएको भन्ने शंका पनि गर्नेले गर्लान् तर कुरा त्यसो होइन । कुरा हो के भने बस्ती भएका ठाउँमा सरदर प्रत्येक आधा किलोमिटरमा डोरी बाँधेर धुनी बाल्न तथा शिवजीको बुटी खान पैसा माग्दै गरेका केटाकेटीहरु ।

रमाइलो त के भने, केही यात्रुले त शिवमन्दिरमा जान नपाएको भन्दै शिवजीलाई भेटी भन्दै केटाकेटीलाई खुशी बनाउँदै थिए । बिचरा राजमार्गमा दौड्नै गाडी मालिक, चालक पो हैरान देखिन्थे । गन्तव्यमा समयमै पुग्नु त कता हो कता, उल्टै पैसा बाँड्दा बाँड्दा शिवजीलाई मिच्छाएको जस्तो अनुभुति गरेका पाइन्थे । हुनपनि कर झैं जम्मा गरिने रकम कति हुँदो हो कुन्नि ।

त्यसो त बार्गेनिङ पनि कम्तीको थियो र, पैसा थोरै दियो भने केटाकेटी दाँत देखाइहाल्ने । हाँस्ने । केटाकेटी मात्रै होइन, शिवजीको बुटीले बिहानैदेखि लठिएका वयस्क मानिस पनि रमाइलो गरिरहेका देखिन्थे । पशुपति भने साँच्चै खुशी भएछन् कि जस्तो लाग्ने । त्यतिमात्र होइन, राजधानीका नागा बाबा चटक्कै बिर्सेर गन्तव्य पछ्याउन बाध्य भएका केही युवा भने साथीहरुको शिव आराधनाको रमाइलो सम्झेर चकचक गर्दै थिए ।

वर्षमा एकपटक आउने शिवरात्री पर्वका लागि देशका शिवमन्दिरहरुमा भीडभाड बढेकै छ । शिवरात्रीमा खुशी मनाउने बानी परेर कुलतमा फसेका मानिस पनि पाइन्छन् । एक दिनको रमाइलो गर्नेलाई त प्रशासनले पनि ठिकै हो, भनेजस्तो लाग्यो, शिवमन्दिरहरुमा जोगीजीहरुले गाँजा बेचिरहेकै छन् । तिनका बारेमा पुरै चुपचाप, त्यतिमात्र होइन, गाँजा ताने नै भनेपनि अरु बेला लागुऔषध भनेर करकर गर्ने गृहप्रशासन यो बेला भने अचम्मैले चुप । यसको असर त पछि पनि पर्ला नि, त्यसबारे पनि सोच्ने कि । तस्वीरमा, शिवमन्दिरमा लागेको भीड ।