महेन्द्र रायमाझी -

सरकार ढलेपछि नयाँ सरकार गठनको बाटो पत्ता लगाउन बैठक बस्ने थालेका छन् दलहरुले । तर अहिलेसम्म सहमतिका लागि निर्णय गर्ने बाहेक केही काम भएन । हुन त एक्कासी आएका परिस्थितिका कारण यसो भएको पनि हुनसक्छ । यसअघिका सरकार गठन गर्ने बेलामा पनि यस्ता बैठक कैयौं दर्जनपटक भएका हुन् । सबै मिलेर जानुपर्नेमा बैठकमा माओवादी, मधेशी फोरम र नेपाल मजदुर किसान पार्टी भने सहभागी भएनन् ।

तर पछिल्लो समयमा सार्वजनिक प्रधानमन्त्री पुष्पकमल दाहाल प्रचण्डले संविधानसभा चुनावअघि दिएको अभिव्यक्ति सार्वजनिक भएपछि अहिले त्यसले भने सम्पुर्ण संसदका पार्टीहरुलाई चकित पारेको छ । प्रचण्डले आफ्ना जनमुक्ति सेनाका कमान्डरहरुलाई दिएको भाषणमा शान्ति प्रक्रिया भनेको केही समयको लागि मात्रै हो भन्ने देखाइएको छ । जसलाई देखेर र सुनेर धेरैजना चकित परेका छन् ।

२०६४ पुस १८ गते दिइएको भाषणमा चुनावलाई विद्रोहको रुपमा लिइएको बताइएको छ । आफ्नो अनुकुलमा चुनाव नभए अरु पार्टीविरुद्ध जस्तासुकै कदम चाल्न सक्ने चेतावनी दिइएको छ । अझ महत्वपुर्ण कुरा त आफ्ना जनसेना वास्तवमा ७ देखि आठ हजारमा रहेपनि नक्कली सेना मिलाएर १९ हजार पुर्‍याइएको जानकारी दिइएको छ कमान्डरहरुलाई ।

यसैगरी पछिल्लो समयमा सेनाविवादबारेमा पनि बोलिएको छ । यदि राष्ट्रिय सेनामा माओवादी लडाकु मिलाइयो भने सम्पुर्ण सेना माओवादीमय हुन्छ र त्यसअनुसार सत्ता कब्जा गर्न सजिलो हुन्छ भनिएको छ । प्रधानसेनापति रुक्मांगत कट्वालले नेपाली सेनामा माओवादी लडाकु गाभिएमा नेपाली सेना खत्तम हुन्छ भनेर भनेको कुरालाई सही रहेको भनिएको छ । माओवादी अध्यक्ष समेत रहेका प्रचण्डको भनाईमा नेपाली सेनामा गाम्न सकेमा त्यो ठुलो उपलब्धि ठानिएको छ । तर गोप्य सामग्री प्रसारण भएपछि भने सबैले जिभ्रो काट्न थालेका छन् ।