महेन्द्र रायमाझी -

पछिल्लो समयमा देशका विभिन्न भागमा दण्डहीनता बढ्दै गएको छ । विभिन्न दलका नेताले एक अर्कालाई दोष लगाएर प्रतिपक्षीको व्यवहार गरेजस्तो देखिएपनि त्यो केही समययता धेरै हदसम्म सही सावित हुँदै आएको छ ।

महाकाली पारीको दोधारा चाँदनीका बासिन्दाले माओवादी कार्यकर्ताले कुट्दा समेत प्रहरीले सुरक्षा नदिएको भन्दै ईलाका प्रहरी कार्यालय घेराउ नै गर्न बाध्य भएका छन् । उनीहरुले स्थानीय बाबाथान बजार बन्द पनि गरेका छन् ।

एकछिनको लागि राजनीतिक दलका नेताले एकअर्कालाई आरोप लगाएका छन् भने पनि यस्ता घटनाले जे गरेपनि हुने जस्तै देखिएको संस्कृतिको झझल्को दिएक छन् । अधिकांश घटनामा माओवादी र एमाले सम्बद्ध युवा संगठनको हात छ भने आपराधिक समुहका सदस्यले पनि सर्वसाधारणमाथि जे गरेपनि भएको छ । त्यस्तालाई कारबाही गर्न सरकारी संयन्त्र सक्रिय छैन ।

खासगरी चुनावका बेलामा यस्ता कुटपिट र धम्कीका घटना बढी हुने गरेका छन् । उपचुनावमा माओवादी लाई भोट नहालेको निहुँमा माओवादी कार्यकर्ता ले सर्वसाधारणलाई कुटेको कैलालीको घटना हो । यसअघि पनि माओवादीलाई भोट नदिएकोमा अन्य दलका कार्यकर्ता र सर्वसाधारण कुटिँदै आएका थिए ।

कम्तीमा जनप्रतिनिधिले यस्ता घटनामा विशेष ध्यान दिनु जरुरी छ । होइन भने के मतलब भयो र जनताले चुनेका प्रतिनिधिको । अनेकथरी भत्ता मात्रै खाएर त भएन नि, गाउँमा आफ्ना जनताको हालत पनि त बुझ्नुपर्‍यो नि ।